Lëvizja Qytetare ZGJOHU! Shkup dhe Grupi i Tifozëve „Shvercerat Shkup“ ashpër i dënojnë paralajmërimet tendencioze për tifozët e KF Bolton Wanderers nga Anglia që mos ta vizitojnë Komunën e Çairit me rastin e ndeshjes kualifikuese për Kupën UEFA ndërmjet KF Rabotnicki Kometall dhe KF Bolton Wanderers që do të luhet në stadiumin e qytetit të Shkupit.

Komuna e Çairit tashmë disa vite me rradhë është nikoqire e reprezentacionit të Maqedonisë gjatë fazave pregaditore për ndeshjet kualifikuese si dhe ka qenë nikoqire e ndeshjeve të përfaqësueseve kombëtare ndër 21 vjet. Rast edhe më konkret është ndeshja mes kombëtarëve të Anglisë dhe Maqedonisë (ndër 21 vjet) që u mbajt në Stadiumin e Çairit  më 05 shtator 2003 ku kombëtarja dhe fansat Anglez ishin jashtëzakonisht mirënjohës për mikëpritjen dhe respektin tradicional të shfaqur nga qytetarët. I gjithë stafi menaxhues i kombëtares, të udhëhequr nga përzgjedhësi Swen Goran Ericsson, gjindeshin në shkallët e stadiumit dhe duartrokitën publikun e Çairit për sjellje korrekte.

Ftojmë autoritetet që të veprojne konkretisht në ndalimin e fushatës negative për gjendjën në komunën e Çairit, ku shumica e banorëve janë shqiptar, dhe duhet të theksojmë se krahas fushatës tepër tendencioze, vizitorët e huaj parapëlqejnë që shetitjet e tyre t’i bëjnë në Çarshinë e Vjetër, Kalanë Ilire, etj, gjitha këto në anën e majtë të qytetit. ZGJOHU! vihet në dispozicion për të mirëpritur fansat Anglez si dhe për të organizuar një ndeshje miqësore në futboll në stadiumin e Çairit ndërmjet tifozëve anglez dhe tifozëve Shvercerat Shkup në frymën e respektit dhe mirënjohjes që kemi për kombin Anglez.